من الأحكام الموثوق بها والتي لا تقبل الجدل إطلاقاً أن أنكر الأصوات لصوت الحمير .. و ( أنكر ) هنا بمعنى أقبح .. وإذا أردت أن تتأكد
من هذه الحقيقة الدامغة فليس عليك إلا أن تقترب من حمار على وشك النهيق .. وضع أذنك اليمنى أو اليسرى بجوار فم الحمار حين يفتحه
ويشرع في النهيق .. وأنظر ماذا ترى .. !!
...
الفقره اعلاه مقتبسه من كائن انترنتي يدعى (ابو بكش)
..
قبل كل شي ..اصعب يوم رمضاني مر علي في حياتي هو اول يوم من رمضان
قبل كل شي ..اصعب يوم رمضاني مر علي في حياتي هو اول يوم من رمضان
....
طبعا قبلها بيوم كنت توني واصل الكويت..اعتقد كانت الساعه عشر بالليل..قبل لاصعد الطياره كلمة اخوي
-انا بالطياره...لاحد يكشت فيني مالي خلق تكسي
اول ماوصلت اطالع ..ماعرفت احد ..اتصلت على اخوي
-وينك؟
-ارسلت لك السايق
-ماشوفه
-اي نسيت لاقولك هذا سايقنا الجديد
-سايق جديد! شلون بعرفه؟؟ اصلا هو شلون بيعرفني!؟؟
-(صوت ضحكته..ضحكته هذي مايضحكها الا اذا احس انه مخمل)لحضه اخذ رقمه
ركبت معاه انشغلت باالتلفون ..احس الطريق غير!اطالع الا برج التحري
-يخرب بيتك شجابنا اهني؟؟
-لاتعليق
-انزل انزل
بطريق العوده ..حسيت ان فيه ذبذبه طالعه من ضرسي
المهم ماكنت اتخيل ان صعوبة اول يوم برمضان راح اطوف صعوبة "يوم التغريزه العالمي" لما غرزة سيارتي بالصبيه في "بحرة" من
الساعه 10 الصبح الى وقت الافطار من سنه من السنين وسبب الصعوبه ..هو التهاب الضرس...انتفخ علي ..وصرت اطق راسي بالطوفه ..
صايم وضرس ملتهب.."ماقزرت"
...
من بعد الفطور ماخليت مضاد حيوي ولامسكن مابلعته
..
تابعت برنامج او مسلسل صوتك وصل المعروض بقناة "الساقط والاقط" الفضائيه شفت الحلقه ..وانشحنت
..
وقتها كنت مسوي حجر صحي مصغر لي ...ماكنت ابي اطلع واروح واجي
ابي الضرس يهدا ..اول يوم رمضان ..والناس رايحه وجايه تبارك ..والعود الازرق في كل حته ...قلت أأجل الطلعه لحد مايرحمني
الضرس...من بعد الحلقه ماقدرت اقعد ...ابي افش شوي
..
دوانيه وسلام ..وتبريكات ..وعسى ماشر؟؟ فيك ابو وجه!!
...
انتظار ..واحد ماسك زاويه وسالفته مو راضيه تخلص..او بالاحرى مو عارف شلون ينهيها..(فيه ناس لاتكلمت في التلفون يوهقون الطرف الثاني مايعرفون ينهون المكالمه فيضطر يدش بسالفه بظهر سالفه) -واخينا بالله نفس الحكايه-مسك الرايه واحد من الربع مسميه
"على طاري" ..كل سوالفه "على طاري" يخرب بيته مستحيل يسكت دايم اقوله وضيفتك مذيع بالاذاعه برنامج تالي الليل وتسولف ..ترا كفائه ....
ضاق خلقي لما قضب مايك الدوانيه ..الاطياب والعطورات قامت تبهذل ضرسي..احس فيه ينبض ..انشغل بصوت مسج من تلفونه قلت
فرصتي...قطيت القفاز عليهم (شفتو صوتك وصل؟؟؟)
-مصخروهم
-والله جاب السعدون
-الا البشت (مع ضحكه)
-ابرة الخطيب مو نفسها ابرة الخطيب اللي قبل؟؟ عند الجمعيه بس كان مصري شنو العلاقه؟؟
-زين يسوون فيهم
....
طبعا الانطباعات جات عكسيه بالنسبه لي ...افهم انهم شخصيات عامه ..ومعرضين للنقد لكن اللي يحصل لاهو نقد..ولايحزنون
اللي حاصل "استقصاااد"
قناة "الساقط والاقط" بعيده عنهم هالمفاهيم ...نظام مفهوم الحريه والراي والراي الاخر
...
يعني استهزاء وتحقير ..وتسليط الضوء ان هالثلاثه هم سبب هالبلاء ..ومحملين بامراض نفسيه ...ومجلس الامه ليس الا مجرد
"كوسه"....وغصب غصب ان الناس تقنط من مجلس الامه
.....
وصل مسج يقول ان الاعلام تعد مذكره قانونيه لاحالة صوتك وصل للنيابه...اذا الغوا البرنامج شلة سكوب شبتسوي؟؟ من بعد "التكبير" شنو الاختراع الثاني؟؟افطار صائم بساحة الاراده!؟
هناك 8 تعليقات:
حاطب ليل حمدالله على السلامة
ومبارك عليك الشهر وعساك من عواده
وماتشوف شر
ههههههههههههه حلوة
افطار صائم
شوف الي يبط الجبد مع انهم ضابطين الشخصيات خصوصا السعدون هو ان الممثلين مو ممثلين ومجمعين المرتدية والنطيحة
تبي الصج اليوم شقوا الحكومة شق اهم وطارق العلي
بس اشدعوه في احد يحس
صباح الخير
و حمدالله على السلامه
و ما تشوف شر
و مبارك عليك الشهر
صوتك وصل..الصج توقعت الأخراج أحسن من جذي بوايد
و الموضوع كله سلق بيض
صج توفّقوا ببعض الشخصيات
بس ركاكة الحلقات ما تقدر تطالعها
ياهلا ويا مرحبا
حمدلله على سلامتك نورت الكويت
ومبارك عليك الشهر
وسلامات ما تشوف شر
ما شاء الله وايد مناسبات عندك؟
عيل خلني اقولك عيدك مبارك اخاف سبحان الله انسى
:P
حاطب اذا صاحبك بخاطره يعرس ترا عندي صديقة بالضبط هذا وصفها،سالفه بظهر سالفه،وكل سالفه عندها لها مثال
!!
يعني تقول راسي
تقول انا جذي
سافرنا
انا بعد
سكتنا...قالت الا على الطاري
وطبعا اذا قلت سهرانi ساعه
قالت انا ساعتين
ضرسي...راح تقولك عيل انا ملتهبه كل ضروسي
انا مسميتها:
more than
:P
وبالنسبه للمسلسل،البارحة اتناقش ويا الوالد يقولي كل مكان بالعالم الشخصيات العامة ينتقدونها بهالطريقة،بس انا احس الموضوع قلة ادب
وسخافة
!!
شي واحد ضحكني وانا امر عليه مرور سريع البارحة:
موضي الحمود وقعدتها
:P
السلام عليكم
حمد الله على السلامة و ما تشوف شر و مبارك عليك الشهر
أنا و لله الحمد مقاطع التلفزيون الشي الوحيد اللي شفته مباراة برشلونة أمس غيره التلفزيون مصخرة و مضيعة وقت
و "على طاري" سكوب، البرنامج أسمع فيه بس ما شفته و واضح أن قلة الحيا هي التعريف السائد للنقد و للحرية هاليومين
و لا بأس طهورا
افطار صائم بساحة الاراده
ههههههههههههههه
بس مو ضابطين دور احمد الفهد ما ادري ليش
و بعدين على ملاقة حيل صراخ و ازعاج و الياهل الخبل هالدب كانه جنيس اهو التنكر الثانية سبب تسونامي
مها
-
علينا وعليك يتباارك
الله يسلمك من كل شر
ماتقصرر
....
فريج سعود
-
هم ضابطين المكياج بس..
ولا الشغل كله ككتابة للمواد مقزرينها يوتيوب
...
nanonano
-
سلمك الله والشر مايجييك
وعلينا وعليك يتبارك
مثل ماتفضلتي "سلق بيض"
واحلا مافي الحكايه ان مسالة التشويه اللي يسوونها ..من ناس كتلة بياخه فيهم ماحصلتش
استكانه
-
سلمك الله من كل شر
علينا وعليك يتباارك
اما العيد..انا توني توني احس برمضاان
ابو طاري وام طاري اذا الله وكتب لهم لبعض احس سالفتهم المفضله لعبة (كم بيض الحمام)
برنامج صوتك وصل هدفه واضح
لاهو نقد ولاتقويم ولاحتى تعبير عن شي
استهزاء وتحقير واضح ..وهذا نهج سكوب
حتى الضيوف اللي يجون برامجها ..علل
.....
مهندسنا
-
الله يسلمك من كل شر
وعلينا وعليك يتبارك
صدقني والله انك البخيت ..اللي مقاطع هالتوافه من الامور
احس بيني وبين نفسي لاوصلت هالمرحله
كاني توني متسبح:)
تعرف هالشعور!:)
الله كريم
........
بو وليد
لما قلدو الحكومه
تعرف مشتهيه ومستحيه
شوفونا ترا حنا ننتقد الحكومه ترا
افلام افلااام
إرسال تعليق