الخميس، 26 مارس 2009

اقول لكم سر..؟؟




في راس السنه اللي فاتت ..كنت في القاهره

حالتي النفسيه وقتها جدا عاديه ليس بذاك الاحباط او الكئابه انما ..عدم الاحساس بشيء

كنت تقريبا متبلد..والحاله هذه" تحظر وتغيب" ..لا اعرف ان كانت طبع او صفه"ان كان هناك فرق"

الجميل في الامر..انها لاتدوم كثيرا

اعتقد لاني استنزفتها اكثر من الازم..لاي شي سواء, يستحق او لايستحق

وقتها راس السنه والمكان القاهره

يعني

"ماسعد الشيطان"

زحمه وازعاج..وسعاده مزيفه

الموبايل مغلق...

واقلب بالقنوات..

ثبت على قناة الوطن وبرنامج تو الليل ...

طلعت الدكتور "منى الغريب"..لم اكن منتبه بدايه الامر

لكن حركاتها كانها "اتاشر لي" ..

(انتبه وينك..ركز وياي!!)

كانت تتحدث عن "الجذب الكوني" والتفاؤل" وكتاب.."السر"

انتبهت ..لكن لم اهتم بداخلي

....

بعد يومين وانا اتجول دخلت مكتبة دار الشروق لاحضت الكتاب وغلافه المميز

اقتنيته

قراته

اندهشت

......

عندما اعجب بشي ..اي شي

ابحث ماذا قيل عنه

...

الحبيب قوقل مايقصر

رايت ناس تمدح..ناس تذم..ناس تلعن..ناس تقول "ضروري يدرس بالمدارس"!!

....

وجهة نظري
اي شي في الحياه ..له فايده
ولان الامثله تظرب ولاتقاس...واحيانا الابيات الشعريه تعتبر ارث للبشريه..احب ان افسر اي بيت او قول
"على مشتهاي":)
(خذ ماتراه ودع شيئا سمعت به... في طلعة البدر ما يغنيك عن زحل )
...

الكتاب يبعث رساله تفاؤل

صحيح انه يركز على "المال" كطريق النجاح

مما يولد جشع وطمع...

صحيح انه يساهم على "الانانيه" على الطريقه الامريكيه

لكن هناك امور جميله ومدهشه

الكاتبه

ركزت على مصطلح

"الكون"

ولخص المصطلح بعباره شهيره للكاتب "باولو" بروايته الخيميائي حين قال

" وعندما تريد شيئاً ما فإن الكون بأسره يتضافر ليوفر لك تحقيق رغبتك "

لاغبار على ذلك ..اذا استوعبنا ان الكاتبه .. غير مسلمه



لنترجم المصطلح على ديننا نحن وعقيدتنا

عن ‏ ‏أبي هريرة ‏ ‏رضي الله عنه ‏ ‏قال :

‏ (‏قال النبي- ‏ ‏صلى الله عليه وسلم -‏ ‏يقول الله تعالى ‏ ‏أنا عند ظن عبدي بي وأنا معه إذاذكرني)

يعني تفائل...

احسن الظن بالله ...اجتهد ..اسع لغايتك..ابذل اسبابك

النتيجه مدهشه..ان احسنت الظن

..

الكتاب به فصل عن "الامتنان"..

نترجم المفرده ونقول

"الحمد"

الحمد لمن..؟؟

لله تعالى

"ولئن شكرتم لأزيدنكم"

يعني مو تاكل "وتمش" ايدك بالطوفه...قول شكرا

سهله جدا

شكرا يارب

الحمد الله

لما يخدمك واحد بتوصيله او جابلك هديه..مو من الذوق تقوله شكرا؟؟

لما بشهر سبعه والساعه ثنتين الظهر ..وتكييف السياره على رقم ثلاثه وانت واقف بالاشاره وجنبك واحد رافع الجام

ماعنده تكييف...

ليش ماتقول شكرا ..ترا عادي كمبريسور الهوا يظرب معاك ..ادري اربع ايام منهار نفسيا عشان هالمشوار

قول الحمدالله

....

بصراحه الكتاب به جوانب مشرقه جدا ...

اذكر البائع لما قال لي

"الكتاب ده غير حاجه جوايه"

...

الى كل حالم..
تشبث بحلمك:)
والله ولي التوفيق
..
تمنياتي لكم بحياه سعيده ..مملوئه بالطمانينه

*ترجمة الكتاب مكتبة جرير



الأحد، 22 مارس 2009

بلوتوث انتخابي:)

نعم الحال محبط ...وتعيس

نعم "مافيش فايده ياصفيه"

نعم معيار اختيار النائب وصلت الى "والله وجبني بعرسي"

نعم الوالده من متابعين قناة سكوب

...

بس لو افترضنا مقاطعة الانتخابات..

شنو الصوت اللي بنوصله؟؟

والله الاقبال صار ضعيف..؟؟

يعني رافضين المجلس!!

خلاص الغو مجلس الامه... الغو الدستور

من حق الكل يتشائم ...

بس فيه امل..ولو انه ماراح يتحقق بس على الاقل

سعي له

عارفين موضوع "الشيكات" ؟؟

اولا

الشيكات مو شي جديد ...ياما شناط

سردادي مردادي للمقرات

من قديم الازل ..بس الجديد شنو؟؟

الجديد .الناس صارت اتكلم..صارت تذم ..

صارت تقول

"سود الله وجيههم"

يعني "صفه" قبل كانت ممدوحه" اللحين "مذمومه"

..

الفكره ان "الاقبال" على الانتخابات لايضعف

احرق الصوت..عادي

عط صوتك للي تحس ان فيه خير

حظوظه ضعيفه؟؟

مو شرط تكتيك انتخابات ..

"اهم"

شي

اذا ضعف "الاقبال" على الانتخابات

ترا

خووش حجه

للي يقول

"مانبي مجلس امه"

*******

"التخزين في الصغر والضيعه..في الكبر"

بس والله مبدع:)

الجمعة، 20 مارس 2009

وابتدا المشوار

اول لوحه



:)
.........

"يقولون"
انشاء تكتل "جديد-قديم"
في الدائره الرابعه
(مسلم البراك-وليد الجري-الشريعان-محمد خليفه)
....
ليش الجرايد صايره اتوزع مجانا ..للبيوت؟؟

الأربعاء، 18 مارس 2009

الله يقطع الحاجه..!

وانا اشاهد المتظاهرين امام مجلس الامه...واحتجاجهم ورفضهم ..له

معتبرها اول مظاهره بالتاريخ تطالب بان لا تكون
"حــــــــــــــره" ..
ذُهلت قليلا..

لكن قلت في نفسي
"الله يقطع الحاجه"

استذكرت مظاهرات القروض ..
"والله يقطع الحاجه"

التجمع والتجمهر ..بديوان نائب
"والله يقطع الحاجه"

سكرتير عضو يتأفف من الاتصالات
"والله يقطع الحاجه"

لوحات الشكر والعرفان ..
"والله يقطع الحاجه"

صور المرشحين على اسطح البيوت
"والله يقطع الحاجه"

التصفيق للكاذب
"والله يقطع الحاجه"

**

عسى الله لايحوجنا لحد

...
محتـاج لــك حـيـل والله يقـطـع الحـاجـه

حدتـنـي وجـيـت اداري دمـعـة عـيـونـي

بايـن عـلـي التـعـب والضـيـق وانتـاجـه

منـهـار لـونـي متـغـيّـر مـاهــو بـلـونـي

لقيـتـك .. الـلـي يـصـد مـعـقـد حـجـاجـه

وانت اقرب النـاس والغالـي ومضنونـي

سـكــرت بـابــك وقـفـلـتـه بـمـزلاجـــه

قــدام وجـهـي وكـل الـنـاس شـافـونــي

لكـن علـى" الله بديـه" الضـيـق وافـراجـه

والا انـت الله معـك خابـت بـك ضنـونـي

وبــــلاش منك ومن موقفك..واحراجه

-لشاعرها :ثامر شبيب






الأربعاء، 11 مارس 2009

هيف الحجرف في ذمة الله



هيف الحجرف

(ابو بدر)
عمله "اجتماعيه " نادره ...
ترحل
....
ابو بدر
رغم "الاعاقه" الى انه طاقه جباره ...
ونموذج لعلو الهمه...
عاشق للبساطه.... قمة التواضع...صاحب نكته
ذو شان عظيم
....
في كل انتخابات ..اذا اشتد وطيس الجدل
تقتبس جملته المشهوره
"الحكي في الصناديق"
من كل الاطياف والاعراق..تردد
...
بو بدر
عســــاك الجنه

الثلاثاء، 10 مارس 2009

احلف بغبارها وبطوزها

تحديث:1- الطيران وقف 2-الموانئ وقفت 3-المزاج اندقر..4-جاري ابحث عن شاليه تمليك باندونيسيا


قال ابو هريرة : سمعت رسول الله صلى الله عليه وسلم يقول :
(( الريح من روح الله تعالى ، تأتي بالرحمة ، وتأتي بالعذاب ، فإذا رأيتموها فلا تسبوها ، واسألوا الله من خيرها, واستعيذوا بالله من شرها )) ابو داود
- (( اللهم إني اسألك خيرها ، وأعوذ بك من شرها )) ابوداود وابن ماجه
-(( اللهم إني اسألك خيرها، وخير ما فيها ، وخير ما أرسلت به وأعوذ بك من شرها وشر ما فيها وشر ما أرسلت به )) مسلم والبخاري





الاجواء هذه اللحظه.. انا ماقول نبي نتحدى الطبيعه..
بس اكيد فيه حل
مثل ما فيه
"حديده" طارت بالسما وقدرة على الجاذبيه ..
اكيد فيه حل .. "نصد" ولو شيء بسيط هالغبار ..
ماقول نغطي الكويت ..بطربال...او نسكرها "بجام"
انا مادري
اذا قدرت اروح الدوانيه...راح اطرح الموضوع عند شلة الانس سابقا
"الخنفشاريه" حاليا
وهم مايقصرون ..ادري فيهم






لاجديد..

مصورها العام...والاغنيه من الاف ام

ولاعزاء للجيوب الانفيه

الأحد، 8 مارس 2009

ثرثره في وسط ..مقبره!!

اليوم في مقبرة الجهرا ..تم دفن ثلاث ارواح نسال الله ان يسكنهم جنته ..وان كانوا محسنين ان يزيد من حسناتهم وان كانو مسيئين فتجاوز عن اسائتهم ..وانت غني عن عذابهم يارحم الرحمن...
..

كان من بينهم "عجوز" ضحيه من ضحايا "صالة الافراح المحروقه" ..نسال الله ان يلهم اهلها الصبر والسلوان..

ثلاث جنائز في يوم واحد.. وكل جنازه تلم "شمل" لوحدهم..فمن الطبيعي ان تزدحم المقبره .."بوجيه" معرفه ثلاث

ارواح في طريقها لان تبتلعها الارض..والناس تراقب ..يطول الوقت فتتشكل الجموع الى دوائر ..وحلقات..ودواوين!!تعلو الثرثره ..شيا فشيا ....
..
واحد من الربع-هايف بيستجوب خلاص؟
واحد ماعرفه-عشان المساجد؟؟
هم واحد ماعرفه-ترا ازعجنا
واحد اعرف شكله بس ماعرف اسمه-شنو ازعجنا بهدمون مسجد وتقول ازعجنا ..زين يسوي في "ابرهه"
واحد اعرف اخوه-"ابرهه" مو اللي قايلها "خضير" قبل؟؟
اللي اعرف شكله-اي صح "خضير" و..
انا-مشتهي اسافر اندونيسيا....

...

واحد داق لثمه-دشيتو موقع "الان" منزلين بيان حق الاعب فهد الرشيدي ينكر البلوتوث
واحد ثاني-جحد يعني؟؟
اللي داق لثمه-استغفر ربك شنو جحد ..مصيبه اعوذ بالله
واحد ثالث-والله هالبلوتوث مرعب ..الله يكفينا شره
واحد شقردي اعرفه-قولو الله لايبلانا..واذا مظلوم ربي راح ينصره ..بس اللي وزعه ودي اقضبه بيدي
انا-ابي اروح اندونيسيا...

....

جارنا-نبي نسوي قطيه
اخوي-ليش؟؟
جارانا-نبي نشتري مواقف متعدد الادوار ونحطها بالشارع
جارنا الثاني-انت بيتك سد لد ومتوهق ..انا على الشارع ماعندي مشكله بالمواقف
جارنا الاول- مو عن بس نبي نخفف زحمه ..عشان عيالنا مايتضايقون لما يلعبون بالشارع
جارنا الثاني-انا اصلا ودي اكلمك عن عيالك..شنو مهيتهم بالشارع يلعبون ؟؟

اخوي-يابو فلان انا ماعندي مشاكل اقط ولو اني مادري شنو هذا متعدد الادوار..بس نصيحه لك ..ترا الجيران بدو يتضايقون منك..كل شوي قطيه مره تشجير ومره طالعلي بسالفة "ملتقى الجيران" رايتك بيضه بس ..شسالفة نزلتك للجمعيه؟؟

انا-يابو فلان انت شقردي محد فاهمك بس مشكلتك ..شقردي زياده عن اللزوم... وراح اروح اندونيسيا

...........

نكتة الدوانيه-تبي تضحك؟؟
غثيث الدوانيه-لا
شريطي الدوانيه-ها بياع الفورد مالك؟؟
مهايطي الدوانيه-ماتخبر لي رنج نظيف؟؟
شريطي الدوانيه-شنو رنج نظيف..ادور جيتي انت؟؟
مخروش الدوانيه-الميت شلون مات؟؟
رويتر الدوانيه-امس فرعية الظفير خلصت للبلدي...
"عصويت" الدوانيه-ورا المقبره ..نعطيها داس هند؟ا؟؟
انا-ضروري اروح اندونيسيا..

....


..سبحان الله

فيه مقاله لتوفيق الحكيم ينعى فيها نفسه..ويتخيل مشهد تشييعه ..وخطبته لهم اثناء تشييعه ..
اتذكر لما قراتها ..اتخذت من حضوري لاي جنازه ..احاول قد ماقدر اني ارتهب من منظر الدفن..
احاول اتامل..احاول اوقف بعيد عن الناس واتامل المنظر.. منظر فيه رهبه لكن الناس سامحهم الله ..
مايخلونك في حالك ..
الدعوه مش قوة ايمان ..ماقول تصنع الحزن ..ماقول صايح..وزور مشاعرك
لكن
الموت له هيبه..له حشمه ..
الحي ابقى من الميت صحيح...
لما تقدر تتحكم بنفسك ..وكنترولك قوي ..ومؤمن ان هذه حكمة الله ..ممتاز
لكن مو معناها
لامبالاه ...

مثل ماقال توفيق الحكيم:
((وان الصمت الرهيب الذي كان يجب أن يحيط بنعشه لم يدم اكثر من دقيقه..ثم بدا الهمس يعلو..والهمهمه ترتفع..والكلام والثرثره يدويان بين الصفوف في طنين كطنين الذباب ذلك ان الناس غير قادرين على نسيان انفسهم والسمو عن هذه الارض والارتفاع عن شئون حياتهم العاديه الصغيره ..اكثر من خمس دقائق))



الخميس، 5 مارس 2009

لماذا احمد الربعي..؟؟

في يوم عادي جدا..من ايام الثانويه ..للعلم وقتها كانت السنه الثالثه لي ادرس "رابعه ثانوي" ..يعني كنت من "الاكباريه

وقتها" ...وقتها حضرت طابور الصباح وكانت على غير العاده ...لاني اتفقت مع "شله" ان تكون الحصه الثانيه نقضيها في الصبيه لــ "التطعيس" ..

اثناء الطابور استشرت الشائعات ان ادارة المدرسه قررت ان تصحبنا بــ "رحله" ..!!

ودلائل تلك الاشاعات ..تواجد الباص عند باب المدرسه!!
بس وين؟؟

العاده اذا ودونا رحله ..ودونا القصر الاحمر ولايرجع مع الباص الا ..الاشقاء العرب او اللي امه تاخذه بالهده !!

يعني القصر الاحمر شسوي فيه اروحله ؟؟
نلعب بالحديقه ؟؟
خطيب وخطيبته رايحين ؟؟نقزقز لب!!
صعقنا لما عرفنا وين بنروح بالرحله ؟؟

ماكان لا بالخيال ..ولا حتى بالاحلام
رحله الى

"ثانوية بنات"
اوففففف
قول قسم:)

ثااانوية بنااات ..ورحله.. وندش داخل
ماصدقنا ..الا ان اكد لنا مدرس التربيه البدنيه .."وقتها ماكنت اكبس الزقاره لاشفته" كان طولي :)
اكد لي
..
اصدر القرار
-شباب كنسلوا رحلة الصبيه..فيه رحله "اهم"
شبعنا تهريب بنقعد

المهم
صارت فوضى الكل يبي يروح
..الصف امتلا على الاخر ..كل الطلبه بالصفوف الثانيه تجمعت بصفي ..
الكل يبي يروح ...
تقريبا سوينا بخطه اشبه بخطة الطوارئ ..طلعنا للباص بالدس
..
وصلنا لـ ثانوية البنات

مع تنبيهات ..وتحذير .. بس طااف
مابي اقولل شنو لبست ..اولا فشله

ثانيا خايف احد سبحان الله من عيال صفي قبل ..بالصدفه يقرا الكلام ويصيدني:)
المهم دشينا ويقعدونا بمدرج ..ومسابق على الكراسي الاولى
ومعانا مدرسه ثانيه ..ازدحم المدرج كله من "المصبنه" ..ومصبنه صح:)

القاعه كلها بنات ومدرسات ...
القاعه كانت بتنفجر من "الخز"

(عزاه لو فيه بلوتوث وقتها):)
مالكم بالطويله

دشو المحاضرين ...ومن بينهم
المغفور له باذن الله تعالى
الدكتو/احمد الربعي
قعدو ووزعو ورود عليهم وحاضرو ..
احنا اساسا مو معاهم
قاعدين ندز رسايل بالخز ..

جا دور الربعي وتكلم ..
شويه شويه
انتقل الخز..... له
صار اهتمام القاعه كلها عليه
شباب بنات مدرسينو مدرسات... حتى المحاضرين
الكل نسى وين قاعد ...الكل ركز
الكل يسمع

اصوات مافيه...خز مافيه ...
الكل معاه..رحمة الله عليه
صار وقت الاساله ..قام واحد من عيال صفي "الله يذكره بالخير" ...
وسال سؤال ناسي شنو كان
ورد المرحوم عليه

بكل اريحيه..وجديه..واهتمام ...
حتى الولد حس بنشوه ..من رد الدكتور

لما خلصت المحاضره وقام الدكتور بيمشي مر من صوبنا
كان ماسك ورد بيده
وقطها للولد اللي سال ..بطريقه عجيبه...مع ابتسامه

ورب الكعبه لالحين هالمشهد في بالي
الولد احس وصل السفف ...
احنا غرنا منه ...
تندمنا ..ليش ماسالناه ...ليش مانقشناه ..ليش مافضفضنا له همومنا
احمد الربعي غير ...
عقل غير..
انسان غير...
رحمة الله عليه
--
*الولد اللي اخذ الورد...تفوق.. وطاف المصاروه بالنسبه
وداعا احمد..

الأربعاء، 4 مارس 2009

تذكرني..!

جنون مفردة "الحل" وصل (اعلا نسبة مشاهده) ..بين الناس
مسجات تلفونات..جرائد منتديات..دواوين..قهاوي
سجال.سجال ..سجال
وانا في حالة
"لامنتمي"
....
لما كل الطيوف الماره تكون مبتسمه..ونرقبها حتى تتلاشى.. بتركيز
لا افهمه
..
الى كل اسبابي..
وذروة احلامي..
الى من لا امل وجهه....
الى قناعاتي..
الى اصراري..وصبره

اليك انتِ لاغير...
"تذكرني"
...
اذا طق "المطر"..
وورد عشب أخضر ...وسط حوشك؟
اذا صار "الورد" ..جوري
على غصــــونك..؟
***
"تذكرني"..!
***
اذاا زاد الهــــــــــــــــــــــــوى
وانشدت
حبالك/على/خيامك
؟؟
***
"تذكرني"..!
***
وخلني (مره) امر على بـــالك...
شلون اسلــــى..؟؟؟
-فرحي
و
-نظر عيني
؟؟

كل ماطريت ....اسمك
تغنى (كل مافيني)

تنكشف"اسرار" روحي
لامن طريت ................................."اسمك"
ولا لــغرد على غصني...وزهر كل "انتظااري"..
اغنيـــلك.....
عصافير..اتفنن
"في هواك"
**
ارجع
وانتا صوتي
وصوت(كل الناس)
لــقلت بفرح...
ارجع

الاثنين، 2 مارس 2009

سمعت اخر نكته..؟؟:)

قديم السؤال صح ..؟:)

بس تسخين ..اتجرا شوي

طبعي خجول ..ويعنني ..وعلبني بعد



فيه عائله سعوديه راحو لامريكا وهم باللغه الانجليزيه "عدم " يعني "ماميش"

ويبون يوقفون تاكسي ..

قالو: تكسيشن

وقف التاكسي وركبوا معاهو

قالو للسواق: ودنا لمطعميشن ناكل.. رزيشن.. ودجاجيشن..

وداهم للمطعم واكلو وخلصو ورجعوا للتاكسي وقالو له: ودنا للفندقيش ن

وداهم للفندق..

قال ابوهم: من يقول ان اللغه الانجلزيه صعبه!؟؟ والله انها تافه واكثربعد من التااااااااافه ..

التفت عليه السواق وقال:


والله لوني ماني سعوديشن كان اكلتو "تبنيشن"

هههههههههههههههههههههههههههههه

....

سوري للسعوديين بس الايميل جاني يقول سعوديين ... عادي يعني :)

اخوان وحبايب


..

الحين فهمت عصبيه الوالده لما بدلة اثاث الصاله ..

كنت اقول شدعوه ..ترا كله اثاث

بس توني استوعب الحيره لما ادقق وتنسق بالالوان ...

شوي ويجيني انهيار عصبي وانا انسق باللوان المدونه ...طلعت حكايه

حتى مادري شنو اخترت اخر شي..زهقت
..