هي المعالي

متواجد حاليا بالمخيم ..الجو روعه حد البكااء..بتكي فيه للساعه ست وبطلع لساحة الاراده

بث مباشر من المخيم...شوفو الجو

هذي سلمكم الله دفايه يسمونها بسوريا "صوبيه" او "صوبيا"..جابها لنا واحد من الربع هديه من حفر الباطن ..قعدنا كم يوم كاشخين

فيها ..كثفنا العزايم على المخيم عشان كل من يحضر ..نكشخ فيها قدامه نظام "مخيمنا احلا من مخيمكم "..توفعنا انه اكتشاف عظيم ..الا ان

اكتشفنا الصدمه طلعت موجوده عند جواخيركبد ..وموجوده بالهبل ...

بس والله عجيبه مو بس ادفي الا تحرق حرق ..تشتغل بالديزل ..تنقط قطرات عليها من عند الصحن الفضي ..وشب لك كلينكس وقطها داخل ..وبس

هذي صورة البايب اللي يطلع دخان الديزل برا...طبعا الدفايه عدوه للبيئه:) مافيها كلام..بس على خفيف

..........

لله الحمد ربعي هم هم من ايام المراهقه ..كبرنا سوى وتهذبنا سوى

يعني اول مخيم اذكره كنا نروحله كلنا بسياره وحده ..وكانت عباره عن خيمه ..وملعب اهم شي انه فيه ملعب ...بدون ماطور وبدون شي

لما قلت تطورنا اقصد قبل يعني سبحان الله ..الواحد مايدش المخيم الا ساحب له سايد..واللحين مايدش الواحد الا قايل السلام عليكم..

قبل مايطلع الواحد الا بهوشه!..فلاوه:)..اللحين يطلع الواحد وهو يقول تمسو على خير..

قبل مانطلع المخيم ..الا اذا اجرينا الاتصالات لبعض..

اللحين محد يتصل.. حتى لو قعد بالمخيم بروحك...كافي

والله كبرنا:)

..

واحد من الربع اعتبره اخو دنيا ..وشاعر ..بس لالحين اقوله انا مو معترف فيك كشاعر.."بغثه بس".....مع العلم ان هالتصرف غلط لان الشاعر لما يمدح نفسه

مثلا يعتبر دفاع عن النفس ..واخذوها مني ..الشاعر لازم ينمدح..لازم يسمع كلمات الاطراء..ويحتاج للتشجيع حتى لو كان شاعر

عصره..اذا الشاعر فقد الاهتمام..انطفأ

صاحبي شاعر ..مزاج

دش امس علي بالمخيم..قلت له اذا ماقصد اليوم ماراح تقصد طول عمرك..(بحكم الجو العجيب)

خلص فنجال قهوته وقال

"هي المعالي إذا مارمت تطلبها..فاعبر عليها على جسرِ من التعبِ"

يفداك يالقرم من كان قائلها ..مع اللذي طالع الأوراق والكتبِ

حتى اللذي كانوا من قبل نشأتها...

ووقف

-كمل!!

-دقرت

-طيب..كذب لسانك

-ليش؟

-تفدي منو؟؟

-والله ماعندي احد يستاهل

-اذا.. كذب لسانك

(البيت الاول مو له طبعا):)

.....

على طاري السريه ومجلس الامه

حاط رهان ..اذا النائب عسكر العنزي صوت ضد السريه

راح اصور نفسي وانا لابس عزكم الله "خري" ودلاغات العائله ..بهالمربعانيه

وبحطها بالمدونه

صوت المطر كنه تعاتيب خلان..!

صوت المطر له اسم..؟؟

لاتفكر ولاتبحث ولا تسال..

ماله اسم !

..

ايام الثانويه لاصارت حصة العربي ونبي نضيع الوقت نسال اساله مالها داعي ..

وخصوصا ايام مسرحية سيف العرب ومشهد (سيدي..شالفرق بين الغزو والحرب؟؟) ونسال المدرس نفس السؤال وهو مايقصر

يسترسل ...واذا فينا نومه نساله عن حرب 73...واذا نبي نوهقه نقوله

"شنو اسم صوت المطر" ؟؟

.....

لمحبي السيما

المدرسه العربيه للسينما والتلفزيون بالنت ... اضافة نموذج السيناريو النهائي لفيلم

"دعاء الكروان "

للاطلاع لطريقة عمل السيناريو بصورته النهائيه

اضغط هنا

اقرأ كأنك تشاهد:)

.......

رحمه ولحمه..مبروك

ضحيه ملاكي:)

عصر النهضه:)

غرفة بالتوك جديده:)
..

بكون طيب حيل وحبيب وامور... والمفروض ماحكم على "هــالروم" قبل البث ولو ان سماتهم على وجوههم ..

بس متى احكم ؟؟ يعني انطر لحد ماتطلع "روم" ثانيه وافهم من خلالها قانون نيوتن واستوعبه
ان( لكل فعل ردة فعل "مساوية" له في المقدار و"معاكسة" له في الاتجاه)
ومشكلة الفعل او ردة الفعل بالاساس...(مقزز)

بس مايندرا يمكن تكون علاج ..او تنفيس ونخلص من موضه طولت حيل

(ويبقى حق مشروع )

****

من رومات البالتوك الى اليوتيوب ..قناتي المفضله:)

اثناء متابعة برنامج روافد باليوتوب كان اللقاء مع الشاعر محمد بن احمد السويدي

خلال اللقاء كانت هناك لقطه يتصفح فيها الشاعر الانترنت ..يستعرض مواقع تم انشائها من قبل "دار السويدي"

استوقفت اللقطه رغبه في قرائة الموقع الرؤيا ماساعدت ..ادقق ماوضحت

اتصال سريع بكحيلان "قوقل" ويطلع لي الموقع
..


الموقع عباره عن عصر النهضه وفنونها

موقع انيق مرتب ودسم جدا جدا

تستعرض فيها جمال تلك الحقبه بسهوله ويسر وتبسيط من غير تعقيد

متعه تاريخيه من شرح لتاريخ ذلك العصر يتخللها متعه بصريه وحتى سمعيه سواء من الموسيقى المعروضه بشكل مناسب
او اللوحات

موقع ثري سواء للباحثين او المبتدئين
او اللي ماكو شغل مثلي:)

انشاءلله

عمر خيرت وليلة القبض على فاطمه

اثناء الاستماع وفي الدقيقه 2:30
يصلني مسج عذب وكأن وقت وصوله كان "نقوه"..للمقطع
..
اهي اشاره فعلا!
وان لم تكن ..يكفي النشوه وقتها
..
لا اذكر اين سمعت او قرأت لأحدهم حين قال
احلم ان تكون حياتي كالافلام الموسيقيه..
فنهاية الافلام الموسيقيه دائما سعيده
...
كثيرا ماقلت "وجدتها" وتتكرر
لكن بفعل التسويف يتخطانا النسيان ويقتلع تلك التي "وجدتها"
ويرحل
...
في الدقيقه 4:00
كأن هناك من يدفعني من الخلف ويقول لي
"افلح"

من فينا هالليله ينام:)

يالله ياكريم..

متفائل جدا

...........

اقول لاحد يخورها بس....

لا من كوكايين ولا من سواد وجه

ولا من منشطات ..ولا من فضايح

والبشر ترقع لك

دخيل قولك على انجلترا بــ 86 ..اركد

مع.. معك

-تمشي معاي للمهرجان التضامني ؟؟
-تضامني حق شنو؟؟
-استنكار للي صار بزايد الزيد
-تعرف زايد الزيد انت؟؟
-شخصيا لا والله ماعرفه
-شلك بدوخة الراس..وانت شيهمك؟؟والله متفرغ
-اقولك شيهمني..وليش اتفرغ واروح
...

لان زايد الزيد "ابن جلدتي" ..ومن ضمن الشعب اللي انا فيه

ويعتبر ناشط ومجتهد .. ومو مكبر الوساده .. مثلي ومثلك

رجل اثر بوقته وطاقته
له حلم اكيد ..بس حلمه يشملني ويشملك ...مو نفسنا .."احلامنا خاصه فينا"

وصارله اللي صار...

واللي صار له من الممكن يصير فيني.. وفيك

ولاني مؤمن امان تام...
ان الجماهير هي الجذور ومن "قواه الله" واجتهد ونشط لغيره هم اوراق هالنبته ...

فانا استنكر ..
ماحدث ...
...
الساعة 7,30 مساء في ساحة الاراده

لاضاقت عليك الوسيعه..غن

"يقولون لا ضاقت عليك الوسيعه غنّ....
وانا اقول شفت مقرد الخلق وش قالت"
مساعد الرشيدي

قبل ماحظي من الدنيا يجمّد ... ماحسب يومي ولا احسّ بمــــــروره

يوم كان اسمي "محيميد" اتحمّد ... كان مسموح انظره وارقى لسـوره

احذف الكوره على بيته تعمّد ... لجل اجي واقول ماحد شاف كوره !!؟

واستلذ بشوفته توّي واكمّد ... بالوصال جروح في الصدر محكــــــوره

وقت واحرقه الزمان ايـلين رمّد ... مايعـوّد لـــو يــدور الفيـــــــــن دوره

راح من عمري وقدني ذا "محمد" ...صعب حتى شوفته في وسط صوره

لمحمد بن فطيس

فاروق حسني..كلمنجي

تحديث : مدونة فريج الهيلق ..للجميل مطعم باكه
انت من جدك؟؟؟؟
انت مديون لنا بموضوع تتكلم فيه عن نيتشة...تسكرها بدون لاتوفي دينك !!
من جديد
انت من جدك؟؟
....

وزير الثقافه المصري فاروق حسني من بعد خسارته لانتخابات اليونسكو صرح بالف الف تصريح ..ان خسارته كانت بسبب مؤامره
صهيونيه ضده لانه ببساطه..عربي ومسلم

-حاطب ليل من الجهراء من بعد التخمه الكرويه " ثلاث مباريات ريال وبرشلونه والفيصلي " يقولك:

"سدها بس..!"
..

ولا اروع من علاء الاسواني بوصفه لما حصل في برنامج العاشره مساءا

"مرشح غير مريح ..مثير للجدل.. ليس بصاحب انجاز"

بعيدا عن عداء الاسواني للحزب الحاكم وولاء فاروق للريس

لكن كلامه واقعي

مصر مليانه عباقره ...ومنجزه ..ومريحه للنفس وغير مستفزه للغير

من بعد "الهوجه" اللي عملها فاروق ذكر في ايلاف انه من بعد انتخابات اليونسكو (اريد ان استجع طاقتي وجهدي من

اجل أن أستكمل المشروعات الثقافية العملاقة التي بدأتها في بلادي‮.. ‬أريد أن أعطي بلادي كل طاقتي وعمري‮.)

ازيد على صفات علاء الاسواني

ان كان فاروق مرشح غير مريح ومثير للجدل وليس بصاحب انجاز فهو ..كلمنجي

يانفس جدي ان دهرك... هازل

مادري وين الخلل او العله

يا تعاطي الناس مع الخبر!

او الطريقه بنقل الخبر...



حاليا قاعد اتابع النقل المباشر لافتتاح جامعة الملك عبدالله...

والربع داشين بمخي يبون يحطونه على الجزيره الرياضيه عشان مباراه ريال مدريد...(والمشكله انهم خوارات لعب)

مو هذي العله

العله اللي غابنتني.....

حسب ماطلعت انها

جامعه بمواصفات جامعة هارفرد..وهارفرد اللي يبيلي حياه ثانيه عشان ادرس فيها

جامعه تعتبر بيئة شبيهة بالجامعات العالمية ..

جامعه هدفها استقطاب علماء من جميع انحاء العالم ..وباحثين من طلبه وطالبات

جامعه مخصصة لبحوث الدراسات العليا العلمية..يعني انتاج علمي

المصلحه ماتصب بس للمملكه العربيه السعوديه وبس

تشمل الخليج ..والشرق الاوسط

والعالم اجمع

ووكالات الاخبار تنقل الخبر بانه

(اول جامعه سعوديه مختلطه)

وبس!!

هذا المهم؟؟

هذا اللي ميزها؟؟

لهدرجه حنا تافهين؟؟

ياعيد ياعيد

"العيد عيد الله وعيد المزايين ... ولا (النشاما) كل يوم لهم عيد"

البيت هذا اهداء للنشاما اللي يداومون بالعيد

..

عيدكم مبارك ..

وتقبل الله طاعتكم يارب
...

اقوى مسج تهنئه للعيد

"عزيزي المشترك:

نذكرك بموعد إستحمامك السنوي

.."العيد غداً"..

شكرا لأشتراكك في خدمة (سبحني):-p

وعيدكم مبارك
...

للمدخنين الغلابه: خلاص مافيه "كربنه" قبل الامساك ..ريحو صدوركم بسكم "شفاح"

ياعيد ياعيد:)

صوتك وصل و..ان انكر الاصوات لصوت الحمير

من الأحكام الموثوق بها والتي لا تقبل الجدل إطلاقاً أن أنكر الأصوات لصوت الحمير .. و ( أنكر ) هنا بمعنى أقبح .. وإذا أردت أن تتأكد

من هذه الحقيقة الدامغة فليس عليك إلا أن تقترب من حمار على وشك النهيق .. وضع أذنك اليمنى أو اليسرى بجوار فم الحمار حين يفتحه

ويشرع في النهيق .. وأنظر ماذا ترى .. !!

...

الفقره اعلاه مقتبسه من كائن انترنتي يدعى (ابو بكش)

..
قبل كل شي ..اصعب يوم رمضاني مر علي في حياتي هو اول يوم من رمضان

....

طبعا قبلها بيوم كنت توني واصل الكويت..اعتقد كانت الساعه عشر بالليل..قبل لاصعد الطياره كلمة اخوي

-انا بالطياره...لاحد يكشت فيني مالي خلق تكسي

اول ماوصلت اطالع ..ماعرفت احد ..اتصلت على اخوي

-وينك؟

-ارسلت لك السايق

-ماشوفه

-اي نسيت لاقولك هذا سايقنا الجديد

-سايق جديد! شلون بعرفه؟؟ اصلا هو شلون بيعرفني!؟؟

-(صوت ضحكته..ضحكته هذي مايضحكها الا اذا احس انه مخمل)لحضه اخذ رقمه

ركبت معاه انشغلت باالتلفون ..احس الطريق غير!اطالع الا برج التحري

-يخرب بيتك شجابنا اهني؟؟

-لاتعليق

-انزل انزل

بطريق العوده ..حسيت ان فيه ذبذبه طالعه من ضرسي

المهم ماكنت اتخيل ان صعوبة اول يوم برمضان راح اطوف صعوبة "يوم التغريزه العالمي" لما غرزة سيارتي بالصبيه في "بحرة" من

الساعه 10 الصبح الى وقت الافطار من سنه من السنين وسبب الصعوبه ..هو التهاب الضرس...انتفخ علي ..وصرت اطق راسي بالطوفه ..

صايم وضرس ملتهب.."ماقزرت"

...

من بعد الفطور ماخليت مضاد حيوي ولامسكن مابلعته

..

تابعت برنامج او مسلسل صوتك وصل المعروض بقناة "الساقط والاقط" الفضائيه شفت الحلقه ..وانشحنت

..

وقتها كنت مسوي حجر صحي مصغر لي ...ماكنت ابي اطلع واروح واجي

ابي الضرس يهدا ..اول يوم رمضان ..والناس رايحه وجايه تبارك ..والعود الازرق في كل حته ...قلت أأجل الطلعه لحد مايرحمني

الضرس...من بعد الحلقه ماقدرت اقعد ...ابي افش شوي

..

دوانيه وسلام ..وتبريكات ..وعسى ماشر؟؟ فيك ابو وجه!!

...

انتظار ..واحد ماسك زاويه وسالفته مو راضيه تخلص..او بالاحرى مو عارف شلون ينهيها..(فيه ناس لاتكلمت في التلفون يوهقون الطرف الثاني مايعرفون ينهون المكالمه فيضطر يدش بسالفه بظهر سالفه) -واخينا بالله نفس الحكايه-مسك الرايه واحد من الربع مسميه

"على طاري" ..كل سوالفه "على طاري" يخرب بيته مستحيل يسكت دايم اقوله وضيفتك مذيع بالاذاعه برنامج تالي الليل وتسولف ..ترا كفائه ....

ضاق خلقي لما قضب مايك الدوانيه ..الاطياب والعطورات قامت تبهذل ضرسي..احس فيه ينبض ..انشغل بصوت مسج من تلفونه قلت

فرصتي...قطيت القفاز عليهم (شفتو صوتك وصل؟؟؟)

-مصخروهم

-والله جاب السعدون

-الا البشت (مع ضحكه)

-ابرة الخطيب مو نفسها ابرة الخطيب اللي قبل؟؟ عند الجمعيه بس كان مصري شنو العلاقه؟؟

-زين يسوون فيهم

....

طبعا الانطباعات جات عكسيه بالنسبه لي ...افهم انهم شخصيات عامه ..ومعرضين للنقد لكن اللي يحصل لاهو نقد..ولايحزنون

اللي حاصل "استقصاااد"

قناة "الساقط والاقط" بعيده عنهم هالمفاهيم ...نظام مفهوم الحريه والراي والراي الاخر

...

يعني استهزاء وتحقير ..وتسليط الضوء ان هالثلاثه هم سبب هالبلاء ..ومحملين بامراض نفسيه ...ومجلس الامه ليس الا مجرد

"كوسه"....وغصب غصب ان الناس تقنط من مجلس الامه

.....

وصل مسج يقول ان الاعلام تعد مذكره قانونيه لاحالة صوتك وصل للنيابه...اذا الغوا البرنامج شلة سكوب شبتسوي؟؟ من بعد "التكبير" شنو الاختراع الثاني؟؟افطار صائم بساحة الاراده!؟

انا الثابت بطين أحزانها

في حاله زمنيه احياها احب فيها تلقي رسائل او اتصالات ...عكس اوقات اخرى

ربما لاني في سفر...

ان تسمع صوت الهاتف ينذر برساله...وعلى يقين تام انه من محب

فانت بطمانينه ...

في وقت زمني ارقب فيها الاخت "سعاده" وهي تغمز لاحدهم وتبتسم لاحدهم ..وتمسح راس احدهم
بعجله ...وتختفي

تكفيني تلك النظره ولو على عجاله...بان ابتسم

ابتسم وانا الامس حلم قديم مؤجل كان يلح ..بازعاج
حلم من بعض الاحلام المبعثره ...

انسى بعضها ...

واستعيد بعضها

واخشى القليل منها ...

جلسه على شكل دائره...

هناك دخان شيشه..وهناك "مسولفجي" لايهدا ..وهناك تائه ..وهناك تعيس..وهناك عازف عود من بعيد
وهناك انا مبتسم ...انصت واتابع وغير مبالي ...

تاتي صوت الرساله ..

اريد قراءة ذاك المحب .. من يكون ..وماذا كتب

اهي دعاء..نكته..بيت شعري..طلب من المحروسه؟؟ "يبشر بالشحم"..ام سؤال عن الاحوال ...!
اقرا الرساله ..

(ترا حنا طيبين وبخير)

اربع كلمات ...فيها من الهلع مايستحق

في وقت القرائه ووقت الاتصال على نفس الرقم ..وقت لايذكر

لكن الهلع ...انتج الف فكره وفكره

هناك فاجعه حصلت

من؟ وكيف؟وش صااار؟؟

ياتي الصوت البعيد

صوت

"من اغلى من طرا ويطري"

صوت من طرد جوع وجداني بسنابل قمح وجهها ..كل صباح

صوت تتشكل به السعاده بأبهى صوره وتقف امامك متسمره من خلال فنجال قهوه من يدها

قبل الاستفسار تبادر ..سبب المسج هو تدارك قبل ان اسمع بخبر حريق الجهرا "الاخير" ...

وبقليل من الكلمات علمت ان لا احد من لي صلة رحم به..كان متواجد

نسبة الذعر تضاءلت ....

لكن هناك من صلته فيني اقوى حتى من صلة الرحم....

هناك الجهراء...

الجهراء
(هي الاول من التذكار...واول ماعرفت اسرار)*

هي الجهراء
(هي الجهرا..واحس الروح تتشكل فضا عصفور)*

هي الجهراء
(هي اوراق الخريف من الحياه بوجهها المسرور)*

هي بكل تاكيد
(هي جفون الغلابه والحطب في مستهل أذار..هي الجهرا النماء و يمكن الجهرا اليباس ..البور)*

هي الجهراء
(هي الطين .. الأثل ..حزن الشمال وسلهمة مقهور...هي اصحابي الغياب وجفن جدي الصامت الثرثار)*

ابي اعرف اكثر...
عرس من؟؟

الاصابات..كم؟؟

لاب توب امتنعت من احضاره...حتى اكمل مابدات به من دون اي ملهاة...رغبه بالجديه وكم كنت بائس بهكذا قرار
...

فلان معاك لاب توب؟؟

انجدني فيه

في قهوة سلينترو...ولاول مره تحدث

اتصفح المواقع الاخباريه ...كل موقع عدد ضحاياه اكثر وبتزايد ..وانا اتصفح ..

تنقطع الكهرباء في المقهى ..لاول مره

هناك مايمنعني من المتابعه ...

اتصال من يكون اهل العرس؟؟

عرفتهم

لهم قرابه ..التقينا في ملاعب "الجسور " في ازمنة قبل ازمنة الغياب

عرفتهم استذكرتهم ...

......
ياجهرانا

مفجوع لك ...

فيني رغبه في السهر مع صعاليكك الذين "مضو منها...لها"*

الفليج وعافت ..والمانع

وغيرهم من

(مضوا مارتلوا
صوت الفراق
بسجدتين الحزن
والمأثور)*

فيني رغبه ياجهرانا
بــ
(اجى بيبانهم
اوقف
والاحظ صبغها
المقشور
وأتنفس هوا الجهرا
وادور ..ادور)*
واسترجعهم !
(اناديهم غلا ..مدري محبه ..مدري استغفار)*
..
*بدر صفوق "بوابة الجهراء الازليه"

قلبي خفق ياكويت

"وذكر فإن الذكرى تنفع المؤمنين"
ليس مسالة نكث للجراح ..وفقط
2-8-1990
درس عميق
اعادة قراءة الدرس..
واخذ عبرته...واستيعابه
والمتابعه للامام
هذا معنى" الانتصار"

اللي بتلسع من الشوربه ينفخ بالزبادي

قنبلة وزيرة التربيه موضي الحمود..اللي قطتها "بلقاء العربيه" وسكرت اذانها

شوفوا شنو ينتج بعدها...والله يستر من القادم

اساسا انا مادري عن شنو اللي بيعدلونه ...

يهمني طريقة رمي "القنبله"

شمعنى قرار مثل هذا يكون بقناه فضائيه؟

وفجأه

ليش الاستفزاز؟؟

ليه حرث الرماد؟؟

موضوع حساس وانكاره "عبط"

اي شي فيه سنه وشيعه ..وعقائد

لها تبعات
لازم التمهيد له..وتسويقه على الاقل


مافيه لجنه تعليميه او شي تبع التعليم بمجلس الامه؟؟

مافيه مستشارين؟؟

مافيه قيادات دينيه ..على الاقل يصير تقارب بينهم ويمهدون قبل اذاعة مثل هالقرار؟؟؟


نظرية المؤامره في محلها ..
الموضوع استفزاز ..وخبث
والحكومه عودتنا على اللسعه ... مو ثقه

....

ابي نفسهم

وانا قاعد اقلب بمقالات بلال فضل بالنت ..متعود عليه ساخر متذمر ساخط متشائم...

ماتعود يمدح احد....

لقيته يقول بسطر واحد بس

("جمعية الرساله".. اجمل شيء في مصر)

لعب فيني الفضول
شمعنى؟؟

ودام اول مدح له يكون للجمعيه هذي ..اكيد شي عليه القيمه!!

رحت طوالي اسأل كحيلان "قوقل"..

(ياكحيلان شعلوم جمعيه "رساله"..؟؟)

ولقيت موقع لهم

دخلت تصفحته ....تعمقت اكثر فيه

لقيته شي مذهل

فعلا شي ايجابي...وانساني بحت
....
بالكويت فيه اعمال تطوعيه ..بس معرفتي فيها
مثل معرفة الشيبان للبلاك بيري...

يعني مابي جمعيات تطوعيه

لمكافحة التدخين او تنظيف شارع الخليج

لا اقصد
لها انشطه من الانسان للانسان
مو شرط اعطيه شي مادي ...

يعني مجموعات تزور مستشفى مكي جمعه مثلا ..

مجموعات تتبرع بالدم بشكل دوري

هذي امثله يعني ..ولا الافكار شكثرها

اذا فيه ياليت تفيدونا ...
لان البطاليه على قفا من يشيل:)
.........
موقع جمعية رساله
"متعة العطاء"

يالله ياللي طالبه ماهو (يضام)..

يالله يا اللي طالبه ما هو يضــام ..تفرج لشخص لاجيٍ عند قـومـي

الحال باد وباقيٍ جسم وعظام.. كنه مريضٍ واقعٍ ومحمـومـي

سجين سجن ولاجيٍ عند ظلام.. ودوني بحور وبالحديد محزومـي

والجفن يسهر تالي الليل ما نام.. ومن جملة الكيفات صرت محرومي

وعزي لمن مثلي عليه الدهر هام.. مقصور رجل ولا جزع ما يشومـي

.....

عسى الله يفك عوقك

....

على القوه ...

لاأستثني احداَ

يا جمهورا مهزوما

ما أوسخنا ... ما أوسخنا ... ما أوسخنا

ما أوسخنا
لا أستثني أحدا!!!

زيدوني عشقا..زيدوني

اخص عليك يامسلم
طلعت انت سبب
تعطيل التنميه وانقطاع الكهربا والماي
وانت اللي مسبب الزحمه بالمستشفيات
وادوية المستوصف بس بندول
طلعت انت سبب الازمه الاسكانيه...مسلم نبي بيوت ذبحنا الايجار
استجوابك بسبته
انفصلت العالم من وظايفها
"اسفخس عليك"
...
شاهبندر
اذا وصفت السعدون
"بالذيب"
ابشرك
الذيب
مدح لا ذم
الذيب رمز للشجاعه والذكاء..والفطنه
الذيب
لاياكل
"الجيفه"
(وحي الذيب ولا مطرد الذيابه..!!)
........
كل مافكر
"بموضوعيه"
بالبراك
يطري علي..ان نبيل الفضل على فؤاد الهاشم على الخليفه على مستر الجويهل
كل ماعطس
رفعت الرايات عليه
يزيدوني بحبه:)
....
بخصوص استجوابه فيه شي لالحين مو مستوعبه
يقولون المعارضين للاستجواب ان استجواب البراك لوزير الداخليه
تغلب عليه
"الشخصنه"
طيب امنا بالله
ان الدعوه "شخصنه" فسرولي شلون شخصنه؟؟
لانه وعد ناخبينه انه راح يستجوب الوزير اذا نجح بالانتخابات
كلام جميل!!
يعني الرجل وعد ووفى بوعده
طيب
دخيل الله
وين الغلط
؟؟؟

حرك البراغي شوي..لاتصدي:)

لغز
على ما ارجع لـ "اسيا"
بقول لكم الحل
يقول لكم يامحفوظين السلامه

"دوله اوربيه في اسمها- مرض- ودواء- وعباده -

واسم حيوان- واسم طير- واسم نهاية الحياة -

واسم شيء ياتي مع الامطار-

وفيه اسم لمنازل الملوك-

واحد الحواس- وشيء تشاهده بالاعراس-

وشيء يزرع"

للي ماله خلق اللغز ..اعلاه:)

لغز اسهل

"فيل نبي اندخله داخل الثلاجه,؟؟؟؟"

شلوووون؟؟

................

تدرون شلون؟؟

الاجوبه بالتعليق:)

ياحلو اشتقنا..والله اشتقنا

أشتقنا يا حلو والله أشتقنا


لكن الزمان مفارقنا:(

يامـــا.. يا مـــا ..ويامــــا

أتعذبنا وبنار الشوق اتلوعنا !!

يا حلو أشتقنا

والله أشتقنا :)
....

جعل فيني العافيه:)

كوارع من عند "البرنس" وبس

وتحط عليها مادري شنو ..! :)

ودلع المعده بملوخيه ..محطوط عليها كل شي حتى الهيل!!

وجبه غذائيه تكفل للمعده غيبوبه كامله لمده 24 ساعه

****

وياجعل فيني العافيه يارب:)

***

شلون هذا..!؟

هنا القاهره ..وفي شرفة سماوية

بالأمس شاهدتهم.

في شرفه سماويه فسيحة مطله على مصرجلسوا يتسامرون.

نجيب محفوظ كان مستأنساً بحضرة سعد زغلول يقرأ له بعضاً مما كتب عنه؛وسعد باشا كان محرجاً لأنه أقل بكثير من هذا الكلام؛ مشيراً لنجيب الى ان أحمد عرابي الذي يحتاج أكثر منه إلى كلمتين حلوتين تخففان مرارته الدائمه من الولس.

عبدالفتاح القصري وبديع خيريوليلى مراد كانوا ميتين من الضحك على أحمد زكي الذي كان يقلد نجيب الريحاني والريحاني لم يزعل ابداً ومن شدة انبساطه طلب من أحمد أن يعيد تقليد محمود المليجي لكي يغيظه مجدداً؛ سيد درويش كان مبسوطاً بلقاء بليغ حمدي لكنه أقسم له أنه لن يكمل كلامه معه إلا إذا ذهب ليحب على رأس محمود الموجي.


توفيق الحكيم كان مكسوفاً من عبدالناصر لكنه أقسم له أنه كان صادقاً في مودته كما كان صادقاً في عودة وعيه بعد ذلك.عبدالناصر لم يطول معه في الكلام واختلى بعبدالحليم الذي كان مندهشاً لأنه بات ينزف مسكاً بدلا من الدم ؛

عبدالناصر أشار له الى مصر ثم قال له: ((شفت وخداني الأماني لحد فين؟؟)) حليم لم يتقبل الدعابه وعبدالناصر شعر بالأحراج وغير الموضوع طالباً من حليم ان يتوسط له لدى جاهين الذي قال له فجأة وامام الناس:((ايوه كنت اقصدك لما قلت ..ياطير ياعالي في السما ..طز فيك..ماتفتكرش ربنا مصطفيك))؛حليم تهرب ورأى أن الموضوع صعب لأن صلاح "شايل جامد"؛وطلب من ناصر أن يترك الأمور تأخذ وقتها.



الشيخ الغزالي الذي كان يجلس مستمعاً بنشوه إلى ام كلثوم وهي تغني القلب يعشق كل جميل؛ استأذن بهدوء لكي لايقطع انسجام محمد عبده والأفغاني وفتحي رضوان وصالح سليم؛وأخذ عبدالناصر من يده قائلا له:((عايز أقعدك مع حد))؛ وناصر وجد نفسه فجأه وجهاً لوجه امام سيد قطب؛الاثنان صافحا بعض بفتور بعد أن ذكرهما الغزالي أنهما في دار حق.

سيد قطب قال لعبدالناصر ان الامر لم يكن يستحق الاعدام فرد ناصر بانفعال:((حط نفسك مكاني ولو قالو لك ان أحداً يريد أن يفجر القناطرالخيريه ))؛وسيد صمت قليلا ثم قال مغمغما:((إن ناصر هو اللي بدأ بالغلط))؛وعندما صمت عبدالناصر ابتسم سيد قطب قبل ان أن يقول له:((بصراحه ماكنتش متخيل إني هاشوفك هنا في الجنه))؛ناصر ضحك بشده وقال له:((شفت هذه هي المشكله..فاكر ان الجنه بتاعتك مع اننا كلنا الان ننتظر الحساب))؛ سيد قطب هز رأسه محرجاً ثم ذهب ليجلس بجوار شهدي عطية الشافعي الذي قال له ضاحكاً:((عاجبك كده..ناقص يجيبوا لنا حمزه البسيوني كمان عشان تكمل)).



علا الضحك من ركن يجلس فيه بيرم التونسي وفتحي قورة حيث كانا يرتجلان قصيده حزينه ليثبتا لعبد الرحيم منصور أن كتابة النكد "مش صعبه يعني"؛أمل دنقل وبهجت عثمان ضغطا على يوسف إدريس ليجلس مع نجيب محفوظ؛ يوسف استجاب لكنه لم يتمكن من منع نفسه من التنبيط قائلا لنجيب:((يعني ماجبتش نوبل معاك))؛ونجيب سريع البديه رد على الفور"((قلنا بلاش أضايقك وانت ميت كمان))؛والاثنان ضحكا بشده وحضنا بعض.

ويوسف قال لنجيب إن اصداء السيره الذاتيه كانت جامده قوي.وعبدالوهاب غنى للجميع بناء على طلب سيد درويش:((حلم وصحيت منه لقيتني هايم في بحر الشوق وحدي...حبيت ظالم ياريته كان هناني)).



من بعيد رأى الجميع السادات يتسلل محاولا الوصول إلى مكان لا يراه احد؛ وعندما ذهب عبدالناصر اليه بخطى متحفزه تكهرب الجو وتأهب الجميع لفض خناقه عارمه؛لكن ناصر اكتفى بوضع يده على كتفي السادات ثم احنى رأسه الى الأسف وجعله يأخذ نظره عميقه إلى مصر قبل أن يشخط فيه قائلا:((عاجبك اللي عملته ده؟؟))رفع السادات رأسه وهو يفكر في رد مناسب لكنه عندما رأى نظرات السخط في عيون الجميع ابتسم ابتسامه ريفيه ماكرة ثم قال:((الواحد صحيح سابق عصره بس مش معصوم من الخطأ)). والكل ماتوا من الضحك؛ لكن مصر كانت غارقه في همها وهي تنظر إليهم بأسى شديد.

....

ماتم عرضه فوق هو للكاتب المصري "بلال فضل"
من اصداره الاخير المجموعه القصصيه "مافعله العيان بالميت" التي تفذ منها طبعتين خلال شهرين فقط!!
واصداره الاول تحت مسمى "بني بجم"..لايقل روعه
كاتب ساخر من طراز فاخر جدا ..قريب جدا جدا من الشارع ..وكاتب سيناريو لافلام اشهرها
"صايع بحر" و "واحد من الناس"
ببساطه مجنون كتابه :)
............
لما سيد حجاب وعمار الشريعي وعلي الحجار يجتمعون ويوصفون القاهره..
هنا القاهره

انت شنو؟؟

طويل العمر
شفيك؟؟
شمسوي بالدائره الخامسه ..؟؟
بلجنة رقم 124 بصناديق الفحيحيل؟؟
اذا السالفه صحيحه
والله مصيبه

مبروك علينا

18779

وحـــش:)

.....

في الدائره الرابعه المركز الــ 11 جايب 11304

وفي الدائره الثالثه المركز الاول جايب7596

لالحين توزيع الدوائر صح؟؟

.....

فازو الحريم

مبروووووك

يارب عاد نخلص من الحنه ...والتكثيف الاعلامي

بس لانها امراه..

كحال الاديب عباس العقاد يرى ابداع طه حسين ..بس لانه "واحد اعمى"

.....

ليش صور الجرايد بتغطيه الانتخابيه بس صور بنات...؟؟؟

....

عسكر

المركز الخامس

و

12869

بل:)

.......

عسى الله يطرح فيهم بركه ويعينهم على تحمل المسؤوليه

وتهدي نفوسهم....والنيه الصافيه

لكافة اعضاء مجلس الامه

بالدوائر الخمس

ومبروك علينا جميعا

الحكي في الصناديق

" الحكــــــــــي في الصناديق"

:)

وريحو ملائكتكم

***********

الزين بالانتخابات هذي ..وغيرها من الانتخابات

اني اشوف شباب زي الورد..بغض النظر توجهه سواء سلب او ايجاب

اشوف شباب ..يحتك يتفاعل ينمي مهارات الاتصال بينه وبين الاخرين ..بشكل مباشر

حالها حال انتخابات الاتحادات الطلابيه ...عامل مؤثر ومهم لبناء الشخصيه

..

الشين بالانتخابات هذي..وغيرها من الانتخابات

"افة اللسان"

يقول الرسول -صلى الله عليه وسلم-

"وهل يكب الناس على وجوههم أو على مناخرهم في النار إلا حصائد ألسنتهم"

عد وخربط ..على "ذنوب" اللسان الفتره اللي طافت .. ولاني بعيد عنها عسى الله يغفر لنا

...

الاجواء متوتره ...لاقصى حد

روح صوت ..

ولما تطلع النتيجه ..خلك راضي

هذهي الديمقراطيه ..

وادعو لهم بالصلاح..

...

وكل الشعب...قال

طريق الجهره واذرب شتيمه

اعلان عن افتتاح مقر مسلم البراك واقامة ندوه بمشاركة
أحمد الشريعان ووليد الجري و خالد الطاحوس .

من اطيح عينك على هالاعلان وتقرا الاسماء ..الا مبرمج يومك ..انك تحضر الندوه
من بداية موسم الانتخابات ثاني ندوه احضرها ..الاولى كانت "مجامله" لمرشح اعرفه واعرف اخوانه وخواله وسلالته ..واذا ماحضرت
راح اكون "مبيوع" ..لمرشح منافس!!..للاسف هذه حروب الدائره الرابعه ان لم تكن معي فانت "مببوع" ماعندنا يوتيوب وحركات:)

الاسماء رنانه بمجال الخطابه الا انها لم تخلو من الكوميديا :)
مثلا لما "قطها" الشريعان..
(نريد اقوال لا افعال)
يحق للشريعان مالا يحق لغيره :)

والجري ذكر اتصل عليه احدهم وقال له "انا راح اصوم وماراح افطر الا على سقوط البراك"
وقال له انشاءلله ماراح تعيد
وسال الحاضرين
يصوووم ولا يعيد؟؟؟
ردو عليه: رااح يعيد
ضيعوا:)

الطاحوس بدا واضحا واثبت تاثره الشديد بالسعدون ..وخصوصا ..باشارة الاصبع
سعد العجمي عريف الندوه ..ابدع
اما صاحب المقر
شوفو ندوته بالتلفزيون :)

....
اعلان احمد السعدون الاخير ...
ضربة معلم
سؤال
اهي نفس الكلمه لما قال
"اجلس ياتراب"
؟؟
اجمل شتيمه:)
ياليت حطوها بالاعلان
..........

على طاري الاعلانات
يوم الاثنين افتتاح مقر فيصل المسلم في خيطان
اعتقد انها راح تكون ثالث ندوه احضرها .. ويمكن الاخيره عناد بسكوب:)

******
بعيدا عنهم:)
عبادي الجوهر
وتغيب الناس وترجع.. وانت غبت ومارجعت!! وش فيك؟؟ وش فيك؟؟

حي بكى حي

فيلم
اللي ماشافه يشوفه
واللي شافه..يشوفه مره ثانيه
...

من الاماني اللي ما ابيها تتحقق
اني اكون
راعي ذود "قطيع من الابل"
دائم اردد
لما اتقاعد
عندي مشروعين
يا شاليه ملك مطل على البحر مباشره في اندونيسيا
او
اجمعلي "ذود"
والمشروعين نتيجتهم
"هاف على وجهي"
...
لي "جد" ..
نسميه بالعائله
"اخر الرجال المحترمين"
لانه من الجيل القديم ..القديم جدا
حافظ للشعر ..ولاينشده عند الطلب..الا بمزاجه
جلست بجانبه واخذت اصوره من تلفوني من دون ان يعي ذلك..
( جك جك ..)
-شقومك؟؟
متسائلا وهو يرقبني
ومن دون اي مراوغه وحزم اجبت
-اصورك..ماعندي صور لك!!
صمت قليلا ...
وانشد

ماذكر به حيٍ بكى حي ياذيب
واليوم أنا بابكيك لو كنت حيا
...

الفيلم يجسد بهدوء واقعنا اللذي يسير نحو "التصادم"
ايامنا الحاليه ليست سوى امتحان...نسال الله الثبات..والعقل
...
البل طرب
وعطايا الله
عندما جاء ذكرها بالقران ..جائت بوصف تساؤلي
"افلا ينظرون الى الابل كيف خلقت"
راقب الابل وتامل

مخلوق عجيب
وكما قيل
" ان حملت اثقلت..وان مشت ابعدت وان نحرت اشبعت..وان حلبت اروت "
تعتبر عز ومفخره..ولا اريدها لذلك
اريد ان احيا بها وتحيا بي
اريد ان اناديها بندائي الخاص..وصوتي الخاص
وتاتي وتطوقني
....
الدنيا مي لحد
نعزي الصبح
ونبارك لمعرس بالليل
موت وميلاد ..
يعني
جدا..ماتسوى
..
وشوفو الفيلم

مسالة مبدأ..!!

ان تكون ذو مبدأ واضح وضوح "النقا"
وتحلق عاليا وتقرأ المشهد بتجرد..
ان تكون في جوله في بستان قلبك
مخاطبا ضميرك
مبتسما مع صِدقك
متكأ على مبدأك..
..
ان تكون مستوعبا لمبدأ ومنهج ولاتحيد عنه

فابشر بزرقاء اليمامه وان ظُلمت
وسلامة عقلك وان شربت من النهر..
..
اجمل ما بالطبيعه ..جباله
لا للعلو ..فالسماء اعلى
ولا لشموخ..فالشجر "يموت واقف"
جمالها بثباتها..وان استعصى عليها الزمن
..
لا
تهنئه
في الاوله اه والثانيه اهين

لحق او ماتلحق..250 الف ريال معترضه

تحديث:
احد الشعراء مواكب لاحداث "مكائن الزئبق"
وهو يرقب الناس ..وتقسيم الرزق مابين "الأسد " و "الفراشه"
فاضت قريحته الشعريه
فانشد وقال:
لا وهني اللي ورثله مكينه...اوليتني خياط ومحصلن فود
يوم المكينه صارت اله ثمينه...والناس صارت بين ناشد ومنشود
اللي لقاها مرضين والدينه...ومن سعد حظه كنه اليوم مولود
وراع"الفراشه" صاح والله غبينه.. وراحت حياته كلها لهود بلهود
وراع"الاسد" يضحك وطابت سنينه... من عقب ماهو ضايق الصدر مقرود
************


يومين محد يسولف عن الانتخابات

شنو انتخابات؟؟

بالطقااق

فيه موضوع اهم

السبب افواج راحت لحفر الباطن بالسعوديه

او اللي عقدت العزم انها تبي تروح

طيب شعندهم بالحفر..؟؟

يقولك "ماكينة الخياطه" القديمه

وصل سعرها

250 الف ريال سعودي!!

وصاير مخامط عليها

مادري شنو الموضوع بالضبط

بس السوالف يقولون تاجر ..وقاعد يجمع

او تجار اردنيين

وشنو شروط الماكينه المطلوبه؟؟

تحط تلفونك تحت مكاينة الخباطه واذا راح السيرفس..اشتروها منك!!

يقولون السبب الرئيسي ..

اكتشفوا ان مادة "الزئبق الاحمر" داخلها

اللي يقول اغراض لصنع الاسلحه

او

تحضير جن او مارد ..او شي المهم شي "ميتافيزيقي" مو عارفه بالضبط:)

اييي وصرت خبره بانواعها ..

فيه نوع الفراشه:)

ونوع "الاسد"

وعلى طاري الخبصه

فيه فرعيه بالدائره الخامسه يوم الاربعاء

وفرعيه بالرابعه يوم السبت :)

والشمامره بالرابعه تفركش اجتماعهم ..خلاص بطلوو

"ايواا يابو خليفه":)

...

وليه ساكت؟؟

ماتعبت وقوف

ليه ماتتكي..؟؟

ياخي اتكي وريح:)